23. febrúar

Loðnuvertíðin í fullum gangi

Björg Jónsdóttir landar á morgun á Norðfirði 380 tonnum af frystri loðnu fyrir Japansmarkað og c.a 500 tonnum í bræðslu. Björgin landaði í Hafnarfirði fyrir viku 380 tonnum af frosnu fyrir Japansmarkað og 623 tonnum í bræðslu í Helguvík.
Bjarni Sveinsson landaði í gærkvöld á Seyðisfirði 930 tonnum í bræðslu og er á leið á miðin. Bjarni er búin að landa fjórum túrum í febrúar.

4. febrúar

Aflafréttir

Bjarni Sveinsson landaði í gær á Seyðisfirði 1050 tonnum í bræðslu og skipti um nót á Norðfirði í morgun, Bjarni er búin að landa tæpum 4000 tonnum frá áramótum.
Björg Jónsdóttir landaði 425 tonnum í bræðslu á Norðfirði í gær og tók snurpuvír um borð, Björg er búin að frysta um 1150 tonn og landa 2250 tonnum í bræðslu frá áramótum

26. nóvember

Þakkir

Útgerðarfélagið Langanes hf. þakkar öllum þeim fjölmörgu sem heiðruðu heimkomu m/b. Bjargar Jónsdóttur Þ.H. 321 til heimahafnar á Húsavík fimmtudaginn 25. nóvember 2004 með heimsóknum, gjöfum og góðum óskum. Guð blessi ykkur öll.

f.h. eigenda og áhafnar Bjarni Aðalgeirsson framkv.stjóri.

Miðvikudagur 24. nóvember.

Heimsigling

Heimsigling Bjargar Jónsdóttur frá Póllandi gengur vel þrátt fyrir leiðinda veður og segja skipverjar skipið koma vel út. Skipið á eftir nokkurra tíma siglingu að Langanesi og verður þar um kl. 21:00 í kvöld, miðvikudag og verður í heimahöfn á Húsavík í hádeginu fimmtudaginn 25. nóvember.

Kl. 15:00 sama dag verður fólki boðið að skoða skipið.

20. nóvember

Á heimleið

Breytingum á Björgu Jónsdóttur ÞH-321 er nú lokið í Póllandi þar sem skipt hefur verið um aðalvél, brú og togspil skipsins. Við prófun reyndist ganghraði 15 sjómílur.

Björgin lagði á stað frá Gdynia í Póllandi kl. 18:00 síðdegis og er áætlað að siglingin taki um 5 sólahringa þ.a. skipið er væntanlegt til Húsavíkur n.k. fimmtudag.

9. nóvember 2004

Björgin að verða klár

Nú er farið að sjá fyrir endann á þeim breytingum sem standa yfir á nýrri Björgu Jónsdóttur í Póllandi. Tvær nýjar myndir má nálgast hér að neðan.

Mynd 1 Mynd 2

20. október

Enn fleiri myndir

10. október

Hér koma nýjar myndir sem teknar voru 8. október.

Myndasíða

17. september

Sjósetning

Björg Jónsdóttir sjósett. Björg Jónsdóttir ÞH 321 var sjósett
miðvikudaginn 15. september eftir viðamiklar endurbætur. Hjál. myndir sýna skipið við sjósetningu. Í tönkum í framskipi eru um 300 tonn af vatni en
allir tankar í afturskipi eru tómir. Síðasta myndin er af nýkeyptu skipi
Samherja sem komið er til Póllands. Áætluð verklok Bjargar Jónsdóttur er 6. október n.k.

Mynd 1 Mynd 2 Mynd 3 Mynd 4 Mynd 5

Mynd 6 Mynd 7 Mynd 8 Mynd 9 Mynd 10

17. ágúst

Bjarni Sveinsson!

Skipt hefur verið um um nafn á m/b. Björgu Jónsdóttur Þ.H. 321- skipaskrá 1508.
Skipið hefur fengið nafnið Bjarni Sveinsson Þ.H. 322. Skip félagsins Birkiland, sem
keypt var í Noregi s.l. vetur og er nú í breytingum í Póllandi hefur fengið nafnið
Björg Jónsdóttir Þ.H. 321 - skipaskrá 2618.

6. ágúst

Brúin komin á nýja skipið. Skoða mynd.

2. ágúst 2004

Myndir frá Póllandi

14. apríl 2004

Sigurður Jakobsson seldur

Í dag miðvikudaginn 14. apríl var Sigurður Jakobsson ÞH 320 afhentur nýjum eiganda Aflorku ehf. Blómvallagötu 13 í Reykjavík. Skipið var afhent í höfn á Siglufirði þar sem það hefur legið undanfarið.

Saga þessa skips er nokkuð löng hjá Langanesi hf. og voru kaup þess á sínum tíma orsakavaldur þess að Langanes hóf að nokkru marki útgerð á uppsjávarveiðiskipi. Það var árið 1987 sem Langanes h.f. og Fiskiðjusamlag Húsavíkur hf. stofnuðu Útgerðarfélagið Brík hf. og keyptu m/b. Ljósfrara RE. Skipið fékk nafnið Galti ÞH 320 og var gert út á rækjuveiðar og loðnuveiðar. Árið 1988 keypti Langanes h.f. hlut
Fiskiðjusamlagsins í Brík h.f. og sameinaði síðan Brík hf. Langanesi h.f. Þá fékk skipið nafnið Björg Jónsdóttir Þ.H. 32l og bar það nafn til ársins 1992 að skipið fékk nafnið Björg Jónsdóttir II. þ.H. 320 og bar það nafn til ársins 1996 að skipið var selt Siglfirðingi ehf. á Siglufirði. Í byrjun árs 2000 keypti Langanes hf. skipið aftur af Siglfirðingi ehf. og fékk þá skipið nafnið Sigurður Jakobsson ÞH.320 og hefur borið það nafn síðan. Skipið hefur lengst af verið gert út til rækju- og loðnuveiða þann tíma sem Langanes hefur átt það, árið 2002 - 2003 var skipið í leigu
hjá Sæsilfri í Neskaupstað.

9. mars 2004.

Í dag þriðjudaginn 9. mars tók Langanes hf. við hinu nýja skipi sínu Birkeland frá Storebö í Noregi. Það voru þeir Bjarni Aðalgeirsson framkv.stjóri og Bergþór Bjarnason stjórnarform. félagsins sem tóku við skipinu fyrir hönd Langanes hf. frá fyrri eigendum í Bergen í Noregi.

5. mars

Vélar keyptar í nýja skipið

Sjá frétt á skip.is

16. febrúar

Útgerðarstjóri

Á stjórnarfundi í Langanesi hf. hinn 12. febrúar s.l. var samþykkt að ráða Bergþór Bjarnason sem útgerðarstjóra hjá félaginu.
Bergþór lærði netagerð hjá Netagerð Höfða hf. á Húsavík og lauk sveinsprófi í netagerð árið l992 og meistaraprófi árið l993. Haustið l996 hóf hann nám við Stýrimannaskólann í Reykjavík og útskrifaðist þaðan úr 2. stigi vorið l998.
Í janúar árið 200l hóf Bergþór nám við Tækniháskóla Íslands og útskrifasðist þaðan sem Rekstrarfræðingur í janúar 2003.
Bergþór hefur starfað við netagerð bæði hjá Netagerð Höfða hf. á Húsavík og Hampiðunni h.f. í Reykjavík. Bergþór stundaði sjómennsku á skipi félagsins frá árinu l986 – l989, og frá janúar 2003 hefur hann verið stýrimaður á Björgu Jónsdóttur, auk þess að sjá um veiðarfæramál félagsins. Frá janúar 2002 hefur Bergþór verið stjórnarformaður Langanes hf. Bergþór er fæddur 11. 08.1970.

5. febrúar 2004

Langanes kaupir nóta- og flotvörpuskip frá Noregi

S.l. þriðjudag undirritaði útgerðarfélagið Langanes hf. á Húsvík kaupsamning við Br. Birkeland Fiskebatrederi AS í Noregi, vegna kaupa á nóta og flotvörpuskipinu M/V Birkeland frá Bergen.

Skipið er 70,67 metra langt og 12 metra breitt smíðað í Flekkefjord í Noregi árið 1975. Í skipinu er frysti- og flökunarbúnaður fyrir uppsjávarfisk sem afkastar 70-80 tonnum af frystum afurðum á sólarhring og er búnaðurinn að miklu leiti nýr frá árunum 1999-2002. Skipið ber um 900 tonn í 6 RSW tönkum og 400 tonn af frystum afurðum. Aðalvél skipsins er af gerðinni Wichman og er 2500 hp. Stefnt er að því að skipið fari í töluverðar breytingar áður en Langanes h.f. tekur það í notkun.

Kaupverð skipsins er trúnaðarmál milli kaupanda og seljanda.
Í framhaldi af þessum kaupum mun núverandi uppsjávarskip félagsins m/b. Björg Jónsdóttir Þ.H. 321 verða sett á söluskrá.